Մեզ մոտ սովորական օրը կարող է տոն դառնալ, և աշխատավայրում մեզ դիմավորում են թարմ մրգերն ու ծաղիկները։ Իսկ տոն օրերը մեզ մոտ միշտ նշվում են կրեատիվ ձևով։ Արդեն գիտենք՝ եթե առջևում որևէ տոնական օր է, ապա մեր մարքեթինգի և մարդկային ռեսուրսների կառավարման բաժինները հետաքրքիր ու յուրօրինակ մի բան են մտածել։ Կազմակերպում ենք թեյախմություն, սրճախմություն, անգամ գարեջրախմության երեկոներ՝ իհարկե աշխատանքից հետո։ Սիրում ենք նաև քաղաքից դուրս անցկացվող թիմ-բիլդինգները։ Օրինակ՝ մենք ունենք մեր սեփական փառատոնը՝ Nairi Food Fest։ Մեզ մոտ առիթը բաց չեն թողնում թիմը միավորելու համար։ Մեր թիմում կարևորում են կարիերայի աճը․ դու կարող ես մեր ընկերություն ոտք դնել կրտսեր մասնագետի հաստիքով, սակայն աշխատասիրության և մասնագիտական աճի շնորհիվ դառնալ բաժնի ղեկավար կամ նույնիսկ ավելին։ Կարևորում ենք անձի շարունակական զարգացումն ու կատարելագործումը, այդ պատճառով էլ տարեկան մի քանի անգամ կազմակերպում ենք մասնագիտական վերապատրաստման դասընթացներ։ Մեզ մոտ մշակված է արտոնությունների ամբողջական փաթեթ, որը պարբերաբար համալրվում և հարստացվում է։ Առանձնացած և աչքի ընկած աշխատակիցը պետք է գնահատվի ու պարգևատրվի, և հենց այդ նպատակով ունենք մեր ներքին արժույթը՝ «նիկոին»։ Յուրաքանչյուր աշխատակից կարող է կուտակել նիկոիններ՝ ցուցաբերելով նախաձեռնողականություն և ակտիվություն։ Օրինակ՝ նիկոին կարելի է կուտակել անգամ ընկերությունում առկա թափուր աշխատատեղի համար լավ թեկնածու առաջարկելու դիմաց։ Կուտակված նիկոինները աշխատակիցը կարող է ծախսել՝ ընտրելով մեր մշակած «փոխարժեքի» ցանկից իր նախընտրած տարբերակը և ստանալ նվերներ, ժամանցի վայրերի տոմսեր կամ նույնիսկ հանգստի հնարավորություն։ Մենք մի մեծ ընտանիք ենք և անկեղծորեն ուրախանում ենք, երբ մեր ընտանիքի անդամների ընտանիքներում բալիկներ են ծնվում։ Մեր ամենասիրելի ու հաճելի գործերից մեկը մեր փոքրիկների համար նվեր-փաթեթների պատրաստումն է։ Մենք սրտաբաց և հյուրընկալ թիմ ենք։ Դե ինչ, կցանկանայի՞ր դառնալ մեր ուրախ ու հաջողակ թիմի անդամ։ Այդ դեպքում անցի՛ր «Թափուր աշխատատեղեր» բաժին և ծանոթացի՛ր մեզ մոտ առկա թափուր հաստիքներին։ Իսկ եթե հիմա հարմար տարբերակ չգտար, մի՛ վհատվիր․ մեր թիմը հաճախ է համալրվում և մեծանում, ու հնարավոր է՝ առաջիկայում դու գտնես մեզ, իսկ մենք՝ քեզ։