Ապահովագրված մարմնի մասերից մինչև ապստամբության ժամանակ վնասվածքներ
Երբ լսում եք «ապահովագրություն» բառը, հավանաբար առաջին հերթին ձեր մտքով անցնում է մեքենայի, անշարժ գույքի կամ էլ առողջության ապահովագրություն։ Այսօր աշխարհում բավականին մեծ տարածում է ստացել նաև մարմնի տարբեր մասերի ապահովագրությունը։ Այսպիսի ծառայություններից հիմնականում օգտվում են աշխարհահռչակ մարդիկ, «աստղերը», ովքեր փորձում են ապահովագրել մարմնի այն մասերը, որոնք համարում են իրենց համար ամենակարևորը։
Այս հոդվածում ներկայացնելու ենք, թե որքան տարբեր և երբեմն զավեշտալի կարող են լինել ապահովագրական դեպքերը, և ապահովագրական ընկերությունները երբ կարող են հրաժարվել փոխհատուցում տրամադրել։
Թաիլանդ․ ապահովագրություն ապստամբության ժամանակ վնասվելու դեպքում
Հանգիստը Թաիլանդում կարող է վտանգավոր լինել տուրիստների համար, այդ իսկ պատճառով կառավարությունը հատուկ ապահովագրական քաղաքականություն է վարում։ Այս երկիրը 10 հազար ԱՄՆ դոլար փոխհատուցում է վճարում այն տուրիստներին, ովքեր Թաիլանդում իրենց հանգստի ժամանակ իրականացված ցույցերի կամ էլ ապստամբությունների ժամանակ վնասվածք են ստացել։ Այս քայլով իշխանությունները փորձում են ապահովել տուրիստների հոսքը երկիր։
Համային զգայարանների ապահովագրություն
Բրիտանացի շատ հայտնի ռեստորանային քննադատ Էգոն Ռոնին կարողացել էր 1957 թվականին ապահովագրել իր համային զգայարանները 400 հազար ԱՄՆ դոլարով։ Իհարկե, ռեստորանային քննադատ լինելն իր հաճելի և համեղ կողմերն ունի, սակայն միշտ չէ, որ հնարավոր է խուսափել անախորժություններից։ Եթե Ռոնին ինչ-որ շատ կծու բան ուտեր, որի պատճառով վնասվեին նրա համային զգայարանները, նա կկորցներ աշխատանքը, այդ իսկ պատճառով նա ապահովագրեց դրանք։
Ապահովագրել կրծքավանդակի մազերը
Հայտնի երգիչ Թոմ Ջոնսը շատերի համար սեքս-խորհրդանիշ է եղել ,ու որպեսզի չկորցնի իր գրավչությունը, երգիչը որոշել է ապահովագրել կրծքավանդակի մազերը։ Շատ տղամարդիկ նախընտրում են հեռացնել անցանկալի մազերը, իսկ Ջոնսը որոշել է դրանցով գլուխ գովել ու ապահովագրել ցանկացած վտանգից։ Թեև դժվար է պատկերացնել, թե ինչ կարող է պատահել կրծքավանդակի մազերի հետ։
Ոտքերի ապահովագրություն
Ոտքերի ապահովագրություն ունեն ոչ միայն կանայք, այլև՝ տղամարդիկ։ Լեգենդար ֆուտբոլիստ Դեյվիդ Բեքհեմը, թեև արդեն ֆուտբոլ չի խաղում, բայց իր կարիերայի գագաթնակետին որոշեց 70 միլիոն ԱՄՆ դոլարով ապահովագրել իր ոտքերը։ Եթե խաղերի ընթացքում նա կարիերային սպառնացող վնասվածք ստանար, ապա գործելու էր նրա ապահովագրությունը։
Ոտքերն ապահովագրել է նաև հայտնի ֆուտբոլիստ Քրիշտիանու Ռոնալդուն։ Ֆուտբոլիստներին, իհարկե, հասկանում ենք, որ ոտքերն են օգնում հսկայական գումարներ աշխատել։ Այնպես որ դրանց մասին պետք է հարկ եղածի պես հոգ տանել, ինչու ոչ՝ ապահովագրել։ Ռոնալդուի ոտքերն ապահովագրվել են 144 միլիոն ԱՄՆ դոլարով։
Կանանց շրջանում ոտքերի ապահովագրություն արել է Մրայա Քերին։ Նա կարողացել է ռեկորդային գումարով ապահովագրել ոտքերը՝ 1 միլիարդ ԱՄՆ դոլար։ Իսկ ահա 79-ամյա երգչուհի Թինա Թրները ժամանակին 3.2 մլն ԱՄՆ դոլարով էր ապահովագրել իր ոտքերը։ Չնայած տարիքին՝ նրա ոտքերը հիանալի տեսք ունեն։
Իդեալական ժպիտն ապահովագրված է
Դերասանուհիներ Ջուլիա Ռոբերթսը և Ամերիկա Ֆերերան ապահովագրել են իրենց ատամները։ Ջուլիա Ռոբերթսի ապահովագրությունը 30 մլն ԱՄՆ դոլար է։ Ամերիկա Ֆերերան իր խաղացած դերերից մեկից հետո, որտեղ բրեկետներով է եղել, որոշել է ապահովագրել իր ատամները 10 մլն ԱՄՆ դոլարով։
Նստատեղի, կրծքերի ապահովագրություն
Այսպիսի ապահովագրություն ունենում են համաշխարհային աստղերը։ Մեծ կրծքեր կամ մեծ նստատեղ ունեցող հայտնիները առողջության ապահովագրությունից զատ, ապահովագրում են նաև դրանք։ Օրինակ, երգչուհի, դերսանուհի Ջենիֆեր Լոպեսը 27 մլն ԱՄՆ դոլարով ապահովագրել է իր հետույքը, մեկ միլիոն ավելի պակաս՝ 26 մլն ԱՄՆ դոլարով էլ ապահովագրված է Քիմ Քարդաշյանինը։ Կրծքերն ապահովագրել է երգչուհի Մադոննան։
Ոտքերի, կրծքերի կամ նստատեղի ապահովագրության մասին խոսելիս նման փաթեթներ ունեցողների շարքը կարելի է երկար շարունակել։ Այս ծառայությունն աստիճանաբար ավելի պահանջված է դառնում հայտնի մարդկանց շրջանում։ Բայց նույնիսկ ամենաթանկ ապահովագրությունը կարող է չգործել, եթե օրինակ՝
• վնասվածքը հենց իրենք են իրենց հասցրել՝ փոխհատուցում ստանալու համար,
• վնասվածքի ժամանակ եղել են թմրանյութերի կամ ալկոհոլի ազդեցության տակ,
• փոխհատուցում չի գործում մարմնի մասերի թեթև վնասվածքների դեպքում, ինչի պատճառով էլ հաճախ հայտնիները դատարան են դիմում այն վիճարկելու համար։