«Ապահովագրություն այլմոլորակայիններից» արտահայտությունը Հայաստանում հնչում է որպես մարքեթինգային կատակ ապահովագրական ընկերությունների կողմից։ Մինչդեռ աշխարհում կան հազարավոր մարդիկ, ովքեր ունեն ապահովագրության այս տեսակը։
Առհասարակ, եթե ուսումնասիրեք աշխարհում գոյություն ունեցող տարօրինակ ապահովագրությունների ցանկը, կզարմանաք, թե ինչքան մարդ է ապահովագրվում, օրինակ, սև մոգությունից, ուրվականների, վամպիրների, զոմբիների հարձակումներից, չար ոգիներից և այլն։ Այս ցանկին ծանոթանալուց հետո բացարձակ տարօրինակ չէ, որ կան մարդիկ, ովքեր ցանկանում են ապահովագրվել այլմոլորակայինների հարձակումներից։ Այլմոլորակայինների հնարավոր գոյության մասին պնդումները ոչ միայն կինեմատոգրաֆիայում և ֆանտաստիկ գրականության մեջ են տեղ գտնում, այլև ժամանակ առ ժամանակ գիտական տարբեր շրջանակներից լսվում։ Ուստի աշխարհի տարբեր երկրներում գտնվեցին ապահովագրական ընկերություններ, որոնք որոշեցին օգտվել «այլմոլորակայիններ կան, թե չկան» կասկածից ու սկսեցին առաջարկել ապահովագրություն այլմոլորակայինների կողմից առևանգումից։
«Մի՛ լքեք Երկիր մոլորակն առանց այս փաթեթի»․ ամերիկյան ապահովագրական ընկերություններից մեկը տարիներ առաջ այսպիսի կարգախոսով սկսեց նոր առաջարկի գովազդային արշավը։ Տարեկան ապահովագրավճարը բավականին փոքր է՝ մոտ 20 ԱՄՆ դոլար, փոխարենը փոխհատուցման չափը բավականին գրավիչ է՝ մինչև 10 մլն․ ԱՄՆ դոլար։ Այս առաջարկը բավականին լուրջ պահանջարկ ունեցավ ամերիկյան հասարակության մեջ։ Արի ու տես, որ թմբլիկ փոխհատուցում ստանալը հեշտ չէ, կասեի՝ մի ամբողջ այլմոլորակային բյուրոկրատիա է։ Բավական չէ, որ հայտարարես, թե այլմոլորակայիններն առևանգել են քեզ, շատ համոզիչ ապացույցներ են պետք։
Հոլանդական ընկերություններից մեկը ևս առաջարկում է ապահովագրություն այլմոլորակայիններից։ Ընկերությունը պատրաստ է հատուցում վճարել, եթե այլմոլորակայիններն առևանգեն իրենց հաճախորդին նրա կամքին հակառակ։ Այս փաթեթի ապահովագրավճարը 12-28 եվրո է, մինչդեռ ապահովագրական պատահարի դեպքում տուժածը գրեթե 5000 եվրոյի փոխհատուցում կստանա։
Անգլիական ընկերություններից մեկն էլ վաճառում է այլմոլորակայինների առևանգումից ապահովագրության փաթեթ, որի տարեկան ապահովագրավճարը 100-150 ֆունտ է, իսկ ապահովագրական փոխհատուցումը կարող է մինչև 1 ու կես միլիոն ֆունտի հասնել։ Բայց փոխհատուցում ստանալու համար կրկին հիմնավոր ապացույցներ են պետք, օրինակ՝ ֆոտո կամ վիդեոփաստ, վստահելի վկա, ստի դետեկտոր և այլն։ Երևի թե ավելորդ է ասել, որ չնայած հազարավոր նման փաթեթներ վաճառվել են, բայց ապահովագրական փոխհատուցում դեռ չի եղել։
Մեծ Բրիտանիայում գոյություն ունի ապահովագրություն նաև այլ պարանորմալ երևույթներից։ Ասում են՝ Լոուստոֆթ քաղաքում կա հյուրանոց, որն արտասովոր ապահովագրության պայմանագիր է կնքել անձնակազմի և հաճախորդների հետ։ Ապահովագրության գլխավոր հերոսը «վանականի ուրվականն է», որը շրջում և անհանգստացնում է կենվորներին։ Ապահովագրական ընկերությունը փոխհատուցում կվճարի այցելուների կամ աշխատակիցների ժամանակավոր, մշտական անաշխատունակության կամ մահվան դեպքում, որի պատճառն են դարձել ուրվականները կամ այլ պարանորմալ երևույթներ։
Ասում են, որ վերջին ժամանակներում բավականին պահանջարկ ունեն իմպլանտներից, տարատեսակ միկրոչիպերից ապահովագրության փաթեթները։