Բեռնափոխադրումը շահավետ, միաժամանակ ռիսկային գործընթաց է։ Բեռները A կետից B հետը հասնելու համար ոչ միայն երկար ճանապարհ են անցնում, այլև՝ ձեռքից ձեռք, տեղ հասնում օդով, ջրով, ցամաքով։ Այս ամբողջ շղթայում տարբեր խնդիրներ կարող են ի հայտ գալ՝ բեռը կարող է վնասվել տարբեր պատճառներով, օրինակ՝ եղանակային անբարենպաստ պայմանների հետևանքով, բեռը կարող է կորել և այլն։ Ու քանի որ հաճախ խոսքը մեծ գումարների մասին է, միայն փոխադրողի պատասխանատվությունը հարցի լուծում չէ։ Հարցի լուծում է «Բեռների ապահովագրությունը»։
Ի՞նչ է բեռների ապահովագրությունը
Ռիսկերը կարող են ի հայտ գալ բեռնափոխադրման բոլոր տեսակների դեպքում՝ցամաքային, ծովային, օդային։ Հետևաբար բեռի ապահովագրություն հնարավոր է կատարել բեռնափոխադրման բոլոր տեսակների պարագայում։ Բեռի ապահովագրություն անհրաժեշտ է կատարել անգամ այն դեպքում, երբ դա չի պահանջվում օրենքով։
Բեռների ապահովագրությունը հատուցում է տրանսպորտային միջոցով (այդ թվում` երկաթուղային, օդային, ցամաքային և ծովային) գույքի տեղափոխման ընթացքում վերջինիս հասցված վնասները:
Ի՞նչ ռիսկերից եք ապահովագրում բեռը
- հրդեհ կամ պայթյուն,
- տարերային աղետներ,
- տրանսպորտային միջոցի հետ տեղի ունեցած վթար, բախում, խորտակում,
- չնախատեսված վայրում, հատուկ պայմաններում բեռնաթափում,
-բեռնման, տեղավորման, բեռնաթափման և փոխադրամիջոցի վառելիքով լցավորման հետևանքով բեռի վնասում և այլն։
Պատճառները տարբեր են, հետևանքները՝ նման․ բոլոր դեպքերում ֆինանսական մեծ կորուստներ են լինում, որոնք հնարավոր է կառավարել, եթե ունենաք «Բեռների ապահովագրություն»։
Հատուցում չի իրականացվի, եթե բեռը վնասվել է, օրինակ․
- Ոչ ճիշտ, թերություններով կամ սահմանված նորմատիվների խախտմամբ փաթեթավորման հետևանքով,
- միջատների, կրծողների, որդերի կամ բորբոսի, սնկերի ազդեցությամբ,
- պետական կամ կառավարական մարմինների կողմից իրականացված բռնագրավման, բռնագանձման, կալանքի, տեղափոխման արգելքի, կալանավորման, դրանց հետևանքների կամ այդպիսի գործողությունների ցանկացած փորձի հետևանքով և այլն։
Նախքան պայմանագիրը ստորագրելն անպայման ծանոթացեք բոլոր դրույթներին, այդ թվում՝ այն դեպքերին, որոնց պարագայում Ապահովագրողը չի իրականացնում ամբողջ բեռի կամ դրա մի մասի ոչնչացման, վնասման հետևանքով առաջացած վնասի փոխհատուցում։
Ի դեպ, բեռների ապահովագրությունն ապահովագրության ամենահին տեսակներից մեկն է: Ասում են, որ այն ձևավորվել է այն ժամանակ, երբ մարդիկ, այսպես ասած, սովորել են առևտուր անել հարևան պետությունների հետ, ապրանքներ տեղափոխել ծովով և ցամաքով։ Այդ ժամանակ էլ սկսել են հոգ տանել ճանապարհին հնարավոր կորուստները կանխելու մասին։