Ավտոապահովագրությունն այսօր անհրաժեշտություն է, առանց որի մեքենա վարել պարզապես անհնար է։ Ու եթե անգամ մի պահ մոռանանք, որ ԱՊՊԱ-ն օրենքով պարտադիր է, միևնույն է՝ առանց ավտոապահովագության անհնար է, որովհետև ռիսկերը տարեցտարի շատանում են։ Մենք առանձնացրել ենք 5 սխալներ, որոնք վարորդները հաճախ են թույլ տալիս ավտոապահովագրության պայմանագիր կնքելիս, հետագայում խնդիրների առաջ կանգնում։ Մենք առաջարկում ենք այս պահից հաշվի առնել հնարավոր սխալներն ու լինել ապահով։
1. Հարևանս խորհուրդ տվեց․․․
Ավտոապահովագրության պայմանագիր կնքելիս մի՛ առաջնորդվեք միայն հարևանի, քրոջ փեսայի փորձով՝ լավ, թե վատ։ Հիշեք՝ այն կարող է սուբյեկտիվ լինել, ու ձեր դեպքում իրավիճակը կարող է լրիվ այլ լինել։ Ուսումնասիրեք, տարբեր կարծիքներ լսեք։
2․ Մյուսն ավելի էժան է․․․
Երբեք ու երբեք մի առաջնորդվեք միայն գնով, կարևոր են գինն ու որակը (խոսքը մատուցվող ծառայությունների մասին է), ընդ որում՝ գործ ունեք ապահովության հետ, հետևաբար, մի՛ խնայեք մի քանի հազար դրամ, եթե կարող եք դրա շնորհիվ ավելի ապահով լինել։
3․ Ես լավ վարորդ եմ, ինձ դա չի սպառնում, ձևի համար է․․․
Ձեր լավ վարորդ լինելն, իհարկե, կարևոր է, բայց երթևեկության մյուս մասնակիցները կարող են վատ վարորդ լինել, կամ կարող են անկանխատեսելի իրավիճակներ լինել, որոնց դեպքում լավ ու վատ վարորդ լինելը կապ չունի։ Ուստի ավտոապահովագրությունը երբեք ձևի համար չէ, ապահովության համար է։ Ուշադիր կարդացեք պայմանները, անգամ եթե դրանք մի քանի թերթ են, միևնույն է, ձեր կյանքում գտեք այդ 10 րոպեն ու ընթերցեք, իմացեք ձեր պարտականություններն ու իրավունքները։
4․ Բանկին այսքանն է պետք, ինչու՞ ավելի վճարել․․․
Եթե ավտոմեքենան գնել եք ավտովարկով, ԿԱՍԿՈ պայմանագիր եք կնքում, կնքեք լրիվ արժեքով, այլ ոչ քե այնքան, ինչքան պահանջում է բանկը կամ վարկային կազմակերպությունը կամ լիզինգի պայմանագիրը։ Մի՛ անտեսեք ֆրանշիզայի առկայությունը։ Կրկին՝ մանրամասն ծանոթացեք պայմաններին, խորհրդատվություն ստացեք ապահովագրական ընկերության աշխատակցից, ու կարևորը՝ վստահեք նրան։
5․ Ընկերս է, մի օր էլ թող ինքը վարի, բան չի լինի
Սա ԿԱՍԿՈ պայմանագրի դեպքում ամենատարածված սխալներից է։ Մի՛ տվեք մեքենան վարորդական իրավունք չունեցող մարդու վարելու կամ եթե անսահմանափակ վարորդներով չեք կնքել պայմանագիրը, ռիսկի մի՛ գնացեք ու մի տվեք այն պայմանագրում չնշված անձի։
Հուսով ենք՝ այս խորհուրդներն օգտակար կլինեն։ Մաղթում ենք բարի ու ապահով ճանապարհ։