Ջրհեղեղ, հրդեհ, գողություն․ սա հնարավոր պատահարների ոչ ամբողջական ցանկն է, որը կարող է մեր բնակարանին վնասներ պատճառել։ Ու այստեղ է, որ օգնության է հասնում գույքի ապահովագրությունը կամ, ինչպես այն ավելի հայտնի է, տան ապահովագրությունը։ Այս ապահովագրատեսակը կօգնի նվազագույնի հասցնել հնարավոր վնասը, բայց կարևոր է ճիշտ ընտրել ապահովագրությունը։ Ինչպե՞ս դա անել։
Ի՞նչն եք ապահովագրում
Սա առաջին հարցն է, որը պետք է ուղղեք գործակալին, երբ պատրաստվում եք բնակարանի ապահովագրություն ձեռք բերել։ Արդյոք ապահովագրում եք միայն բնակարանի/տան պատերը, թե՞ նաև ներքին հարդարումը, կրող կառույցներն ու համակարգերը, շարժական գույքը և այլն։
Եթե ունեք թանկարժեք այնպիսի իր, որի ապահովությունը հատկապես կարևոր է Ձեզ համար, ճշտեք՝ այն ևս պաշտպանվա՞ծ է լինելու ապահովագրության շրջանակում, թե՞ առանձին պայմանագրի կարիք կա։
Ի՞նչ ռիսկերից եք ապահովագրում
Բնականաբար, գրեթե անհնար է, որ գույքի ապահովագրությունը պաշտպանի հնարավոր բոլոր ռիսկերից։ Օրինակ, արդյոք ընկերությունը կփոխհատուցի՞ վնասը, եթե այն առաջանա պայթյունի, տարերային աղետի, գողության, կենդանիների և այլն պատճառներով։ Անհարմար մի զգացեք մանրամասն հարցեր տալ․ Դուք ապահովություն եք գնում, ուստի պետք է հստակ հասկանաք, թե ինչից եք պաշտպանում ձեր տունը։
Բացառություններ
Յուրաքանչյուր պայմանագրում նախատեսված է նաև բացառությունների ցանկ, որոնց վրա ապահովագրական փոխհատուցումը չի տարածվում։ Անպայման ճշտեք այդ ցանկը նախապես։ Օրինակ, սովորաբար գործադուլերի, ահաբեկչական հարձակումների, պատերազմների հետևանքով գույքին հասցված վնասը չի հատուցվում։
Որքա՞ն հատուցում եք ստանալու
Նախապես անհրաժեշտ է ճշտել, թե ինչպիսի վնասի դեպքում առավելագույնը որքան հատուցում կարող եք ակնկալել։ Օրինակ, շարժական գույքին, ներքին հարդարմանը պատճառված վնասները յուրաքանչյուր դեպքում առավելագույնը որքան կարող են լինել։ Ճշտեք նաև՝ արդյոք ձեր պայմանագրի դեպքում չհատուցվող գումար կիրառվում է, թե ոչ, և որքան է այն կազմում։
Ի՞նչ է պետք անել պատահարի դեպքում
Սա ապահով լինելու գլխավոր պայմաններից մեկն է՝ հստակ իմանալ գործողությունների այն պլանը, որին պետք է հետևել պատահարի դեպքում՝ որ համարով զանգահարել կամ կապի ինչ միջոցներ օգտագործել ու ամենակարևորը հարցերից մեկը՝ ինչ ժամկետում է պետք հայտնել ընկերությանը պատահարի մասին։