ԿԱՍԿՈ-ն տրանսպորտային միջոցի (ՏՄ) ապահովագրություն է, որն ունենալու դեպքում հատուցվում է ՏՄ-ին պատճառված ֆիզիկական վնասը՝ անկախ վարորդի մեղավորությունից։
Շատերը հարցնում են՝ ինչի՞ համար է պետք ԿԱՍԿՈ, եթե կա ԱՊՊԱ։ Հիշեք՝ ԱՊՊԱ-ն ավտոտրանսպորտային միջոցի օգտագործումից բխող պատասխանատվության պարտադիր ապահովագրություն է, որի շրջանակներում հատուցվում են ավտոտրանսպորտային միջոցի շահագործման հետևանքով երրորդ անձանց պատճառված անձնական և/կամ գույքային վնասները: Այսինքն՝ հատուցում ստանում է տուժած կողմը, իսկ մեղավոր կողմը՝ ոչ և ստիպված է լինում ինքն իր գրպանից վճարել իր մեքենային պատճառված վնասի համար։
Իսկ ԿԱՍԿՈ-ն կամավոր ապահովագրության տեսակ է, որը պաշտպանում է տրանսպորտային միջոցի սեփականատիրոջ շահերը: Նույնիսկ եթե հենց նա լինի վթարի մեղավորը, և իր վարած մեքենան վնասվի վթարի հետևանքով, ԿԱՍԿՈ վճարումները կփոխհատուցեն այդ վնասը: Մեքենայի սեփականատերը գումար կստանա, կամ մեքենան կվերանորոգվի ապահովագրական ընկերության հաշվին։ ԿԱՍԿՈ-ի սակագները յուրաքանչյուր ապահովագրող ինքն է սահմանում։
ԿԱՍԿՈ-ի սակագնի ձևավորման վրա տարբեր գործոններ են ազդում, օրինակ՝ մեքենայի տարիքը, վարորդի տարիքն ու վարորդական պատմությունը, փորձառությունը, մեքենայի մակնիշը, մեքենայի շուկայական արժեքը և այլն։ Այսպես ասած, ԿԱՍԿՈ հաշվիչն այնքան հեշտ չի աշխատում, ինչպես ԱՊՊԱ-ի դեպքում է, դրա համար էլ եթե ուզում եք ձեր մեքենայի ԿԱՍԿՈ ապահովագրության արժեքն իմանալ, պետք է հենց ապահովագրական ընկերությանը դիմել։
ԿԱՍԿՈ-ն ավտոապահովագրություն է, որը բառի բուն իմաստով կփրկի ֆինանսական վնասներից տարբեր իրավիճակներում, ոչ միայն ավտովթարի դեպքում, այլ եթե շենքի տանիքից ինչ-որ բան ընկնի մեքենայի վրա, ծառը շրջվի քամու հետևանքով, ավտոմեքենան կամ դրա մասերը գողացվեն և այլն։ Ինչպես գիտեք, բոլոր այս վնասները ԱՊՊԱ պայմանագրով հատուցման ենթակա չեն։
Ի դեպ, ԿԱՍԿՈ ունենալու համար մեքենան պետք է լինի առավելագույնը 10 տարեկան։ Եթե մեքենան ավելի քան 10 տարվա վաղեմության է, ՆԱԻՐԻՆ առաջարկում է Casco Universal ծրագիրը։