Բացի վառ հույզերից, նոր տպավորություններից և գեղեցիկ լուսանկարներից, արձակուրդը կարող է որոշակի ռիսկեր ունենալ: Կարևոր չէ, թե որտեղ է անցնում Ձեր հանգիստը՝ Եվրոպայում, թե Աֆրիկայում։ Զբոսաշրջիկը կարող է ընկնել ու վնասվածք ստանալ, չափն անցնել արևայրուքի հարցում, կամ կարող է՝ արձակուրդը հենց սկզբից փչանա, ասենք՝ թռիչքը հետաձգվի կամ չեղարկվի։ Սրանք տարբեր իրավիճակներ են, որոնք կառավարելու համար էլ ուղևորությունը ծրագրելիս անպայման պետք է ունենալ տուրիստական ապահովագրություն կամ, ինչպես հաճախ զբոսաշրջիկներն են այն անվանում, բժշկական ապահովագրություն։ Փորձենք համառոտ ներկայացնել՝ ինչ է այն, և ինչ դեպքերում է փոխհատուցում տրամադրվում։
Նախ հենց սկզբից եկեք հասկանանք՝ որքան էլ սխալմամբ այս ապահովագրատեսակը հաճախ անվանում են բժշկական ապահովագրություն, բայց այն առողջության ապահովագրություն չէ, հետևաբար արտերկրում չեք կարող պարզապես բժշկի դիմել, օրինակ՝ որևէ բուժստուգում անցնելու համար, եթե դրա համար հստակ պատճառներ չկան։
Travel Insurance-ը հատուցում է նախատեսում անհետաձգելի, շտապ բուժօգնության դեպքում, դա նշանակում է՝ եթե որևէ զննություն անցել եք, ապա այն ցուցված է եղել բժշկի կողմից՝ ձեզ անհետաձգելի, շտապ բուժօգնություն տրամադրելու համար։ Ճամփորդական ապահովագրության փաթեթները շատ տարբեր կարող են լինել։ Եկեք որպես մի օրինակ դիտարկենք Նաիրի Ինշուրանսի «Արտերկիր մեկնողների աջակցության ապահովագրություն» ծրագիրը։ Այս դեպքում ևս սակագնային տարբեր փաթեթներ կան, որոնց դեպքում ապահովագրված անձը կարող է փոխհատուցում ստանալ նաև էքստրեմալ սպորտաձևերով, հոբբիներով զբաղվելու ընթացքում ստացած վնասվածքների համար։ Ասենք՝ Ալպերում դահուկասպորտով զբաղվելիս ընկել ու վնասել եք ոտքը, պատկերացնու՞մ եք չէ, թե Շվեյցարիայի կամ Ֆրանսիայի հիվանդանոցներում ինչ աստղաբաշխական գումարներ են բուժօգնության համար, եթե չունեք ապահովագրություն։
Ընտրելով ապահովագրական ճիշտ փաթեթ՝ դուք կապահովագրեք ոչ միայն Ձեզ ֆիզիկապես, այլև Ձեր ուղեբեռը։ Համաձայնեք՝ կարող է ամբողջ ուղևորությունն իդեալական անցնել ու ամենավերջում՝ հայրենիք ժամանելիս հանգիստը ջուրն ընկնի, երբ օդանավակայանում պարզեք՝ ուղեբեռը չկա կամ վնասվել է։
Զբոսաշրջային ապահովագրություն ձեռք բերելիս կա՛մ մանրամասն հարցրեք գործակալին՝ ինչից եք ապահովագրվում և որքան հատուցում եք ստանալու, կա՛մ եթե օնլայն ապահովագրություն եք գնում, նախօրոք մանրամասն կարդացեք պայմանները։
ՈՒ չմոռանաք նաև նախապես պարզել՝ պատահարի դեպքում ինչպես, ուր պետք է դիմել և ինչ տեղեկատվություն պետք փոխանցել․ այս մասին անպայման հայտնեք նաև Ձեզ հետ ճամփորդող անձին։