Կատարյալ արձակուրդ պլանավորելու համար քիչ է որոշել ուղղությունը, գնել ավիատոմսերը, ամրագրել կացարանը։ Կարևոր է կանխատեսել հնարավոր ռիսկերը և պատրաստվել ցանկացած հանգամանքի, և ահա թե ինչու է կարևոր ապահովագրվելը։ Մի շարք երկրներ մուտքի համար պահանջում են անպայման ունենալ ճամփորդական ապահովագրություն։ Քանի որ արտերկրում բժշկությունը բավականին թանկ արժե, ապահովագրությունը երաշխավորում է, որ անկանխատեսելի, հանկարծակի ի հայտ եկած առողջական խնդիրների դեպքում ձեր ապահովագրական պայմանագրով բժշկական ծախսերը կհատուցվեն։ Դրա համար էլ, օրինակ, շենգենյան վիզա ստանալիս պահանջվում է առնվազն 30 հազար եվրո ծածկույթով ճամփորդական ապահովագրություն ունենալ։
Երբեմն ճամփորդելիս մարդիկ դժկամությամբ են ապահովագրություն ձեռքբերում՝ կարծելով, թե դա անիմաստ ծախս, քաշքշուկ ու ևս մեկ ավելորդ թուղթ է։ Մինչդեռ ապահովագրությունը զուտ ծախս չէ, այն ներդրում է անվտանգության ու հանգստության համար։
Ճամփորդական ապահովագրության կարևորությունը լիարժեք գիտակցում ես, երբ թեկուզ մեկ անգամ ծանոթներիցդ մեկն այն օգտագործելու կարիք է ունենում։ Օտար երկրում այն իսկական փրկօղակ է դառնում։
Որպեսզի փրկօղակը ճիշտ աշխատի և հիասթափություն չբերի, անհրաժեշտ է ապահովագրական պայմանագիր կնքելիս մանրամասն ծանոթանալ պայմաններին։
Ապահովագրական գները ձևավորվում են պայմանագրի պարունակությունից, այսինքն՝ այն ռիսկերից, որոնք ծածկում է պայմանագիրը։ Օրինակ, բազային ռիսկերից բացի ավելի բարձր արժեքի դեպքում պայմանագիրը կարող է ներառել նաև, օրինակ, ուղեբեռի կորստից կամ թռիչքի ուշացումից և չեղարկումից ապահովագրություն։ Եթե պատրաստվում եք էքստրեմալ սպորտաձևերով զբաղվել արտերկրում, օրինակ՝ սերֆինգ, դայվինգ, սաֆարի-տուրի մասնակցել և այլն, պայմանագիր կնքելիս ուշադիր եղեք, որ էքստրեմալ սպորտաձևերը բացառությունների շարքում չլինեն, այլապես անգամ վնասվածք ստանալու դեպքում փոխհատուցում չեք ստանալու։
Ապահովագրության պայմանները թեպետ կարող են երկար ու ձանձրալի թվալ ընթերցանության համար, բայց հավատացեք՝ ձեր կյանքից ծախսված 5 րոպեները հետագայում պաշտպանիչ վահան կդառնան։ Կարևոր է նաև հստակ իմանալ՝ ինչ քայլեր պետք է անել, եթե ապահովագրական պատահար է տեղի ունեցել։ Մեկնելուց առաջ մանրակրկիտ ուսումնասիրեք այդ հարցը, ձեռքի տակ ունեցեք այն կոնտակտները, որոնցով կկարողանաք կապ հաստատել դեպքի ժամանակ։ Պահեք բոլոր անհրաժեշտ տվյալները հեռախոսում, որպեսզի միշտ ձեռքի տակ լինեն։
Ապահովագրվեք, ճամփորդեք անվտանգ, եղեք ապահով օդում, ջրում և ցամաքում։